अमेरिकी ग्रीनकार्ड होल्डर बेहुलाले ५० लाख दाइजो मागेपछि…
काठमाडौं । प्रहरीले काठमाडौंको नक्सालमा विवाह मण्डपबाटै बेहुला पक्राउ गरेको छ । बेहुली पक्षसँग ५० लाख दाइजो माग्ने सुनसरीका ३२ वर्षीय अनुराग रौनियार पक्राउ परेका हुन् ।
मंगलबार दिउँसो नक्सालस्थित लिसरा रिसेप्सेन पार्टी प्यालेसमा विवाह हुँदै गर्दा बेहुलालाई प्रहरीले पक्राउ गरेको हो । रौनियार अमेरिकाको ग्रीनकार्ड होल्डर हुन् । बेहुला पक्षले मागेको दाइजो नपाएको भनी दुई पक्षबीच विवाद भएको सूचनाका आधारमा प्रहरीले रौनियारलाई पक्राउ गरेको हो । ५० लाख रुपैयाँ दाइजो नपाए विवाह नगर्ने अडान बेहुला पक्षले लिएपछि घटना प्रहरीसमक्ष पुगेको हो। मण्डपमा रहेकी बेहुलीलाई समेत गाली बेइज्जती गरेको आरोप केटी पक्षको छ ।
विवाह खर्च बापत केटा पक्षले पटकपटक गरी २२ लाख रुपैयाँ बुझिसकेको पनि प्रहरीको प्रारम्भिक अनुसन्धानमा खुलेको छ । रौनियारलाई काठमाडौं जिल्ला अदालतबाट पाँच दिनको म्याद थप गरेर प्रहरीले अनुसन्धानलाई अघि बढाएको छ।
