काठमाडौँ । उपप्रधान तथा सहरी विकासमन्त्री प्रकाशमान सिंहले सिंहदरवारभित्र निर्माणाधीन संघीय संसद भवनको काममा विगतका कमीकमजोरी दोहोरिन नदिने गरि काम भइरहेको बताएका छन् ।
संघीय संसदको राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिको बैठकमा संघीय संसद भवन निर्माणको हालको कार्यतालिका र सो कार्यतालिका कार्यान्वयन सुनिश्चित गर्ने मन्त्रालयको तयारी सम्बन्धमा शुक्रबार भएको छलफलका क्रममा मन्त्री सिंहले समयमा काम नसक्ने कन्ट्रयाक्टरप्रति मन्त्रालय निर्मम हुने बताएका हुन् ।
समितिमा समिति सदस्यहरुले उठाएका जिज्ञासामा जवाफ दिँदै मन्त्री सिंहले नयाँ संसद् भवन निर्माणको काममा बेपर्वाह नगर्न सरोकारवालाहरलाई पटक पटक ध्यानाकर्षण गराइसकेको जानकारी दिए ।
थप भएको अवधिभित्रै काम सक्ने विश्वसनीय कार्ययोजनाअनुसार अहिले काम भइरहेको र सो कार्यको मन्त्रालय र विभागबाट अनुगमन भइरहेको उनले बताए ।
‘नयाँ संसद् भवनको काम समयमै नसकिएकोबारे सबै जानकार छौं । तोकिएको समयमा काम नगर्नेहरु मनत्रालयले कडाइ गरिरहेको छ । कीर्तिपुर क्रिकेट स्टेडिममा जरिवाना लगाएर। काम भइरहेको छ । संसद भवनको काम पनि कार्यतालिका बनाएर अघि बढेको छ । सरकारले विगतका कमी, कमजोरीहरूलाई नियालेर उक्त कमजोरी अव दोहोरिन नदिने गरी काम गरिररहेको छ ,’ उनले भने ।
काम समयमै सक्नका लागि मन्त्रालयदेखि सम्बन्धित इन्जिनियर, महानिर्देशक र आयोजना प्रमुखलाई समेत बोलाएर निर्देशन दिइसकेको पनि सिंहले बताए ।
मन्त्रालयका सचिव गोपाल सिग्देलले पुस दोस्रो साता काम सम्पन्न गरिसक्ने गरि कार्यतालिका बनाएर कन्ट्राक्टरले काम गरिररहेको भन्दै समितिमा तालिका प्रस्तुत गरेका थिए ।
आउने अधिवेशन नयाँ संसद भवनबाटै सञ्चालन गर्ने गरि काम अघि बढेको भन्दै तालिकाअनुसार काम अघि बढ्नेमा आफू विश्वस्त रहेको बताए । समिति सदस्यहरुले आउने अधिवेशन नयाँ संसद भवनबाट सञ्चालन गर्ने गरि काम सक्नुपर्नेमा जोड दिएका थिए ।
प्रतिक्रिया