सत्तारुढ नेकपाको सचिवालय बैठक जारी
काठमाडौं । सत्तारुढ नेपाल कम्युनिष्ट पार्टीको सचिवालय बैठक बसिरहेको छ । प्रधानमन्त्रीका प्रेस सल्लाहकार सूर्य थापाका अनुसार प्रधानमन्त्री निवास बालुवाटारमा बैठक बसिरहेको हो । बैठकमा पार्टीभित्र देखिएको विवाद समाधान र समसामयिक राजनीतिबारे छलफल हुने बताइएको छ । नेकपाले स्थायी कमिटी बैठक स्थगित गरेर आज सचिवालय बैठक बोलाएको हो ।
गत असार १० गतेबाट जारी रहेको नेकपाको पाँचौँ स्थायी कमिटी बैठक पार्टीको आन्तरिक विवाद मिलाउन पटकपटक स्थगन हुँदै आएको छ । शुक्रबार डाकिएको स्थायी कमिटी बैठक आइतबारसम्मका लागि स्थगित गरिएको छ । सचिवालय बैंठक अघि अध्यक्षद्वय केपी शर्मा ओली र पुष्पकमल दाहाल प्रचण्डबीच भेटवार्ता भएको थियो ।