सरकारलाई शान्तिपूर्ण आन्दोलनमाथि दमन नगर्न जनता समाजवादी पार्टीको चेतावनी
काठमाडौं । जनता समाजवादी पार्टीले शान्तिपूर्ण आन्दोलनमा दमन नगर्न सरकारलाई चेतावनी दिएको हो । पार्टी अध्यक्षद्वय महन्थ ठाकुर र उपेन्द्र यादवले शुक्रबार विज्ञप्ति जारी गरी कोरोना नियन्त्रणमा सरकार असफल भएको भन्दै अनियमितताका बारेमा आवाज उठाउँदा शान्तिपूर्ण आन्दोलनमा प्रहरी दमन गरिएको भन्दै आपत्ति जनाएका हुन् ।
उनीहरुले जनप्रदर्शनमाथि दमन बन्द गरी माग सम्बोधन गर्न आग्रह गरेका छन् । सरकारले कोरोना नियन्त्रणमा लिएको नीति असफल भएको भन्दै तथा अनियमितता भएको भन्दै केही दिनदेखि देशभर सरकारविरुद्ध प्रदर्शन भइरहेका छन् । प्रदर्शनकारीमाथि प्रहरीले पानीको फोहोरा र अश्रुग्याँस प्रहार गर्ने गरेको छ ।