जनता समाजवादी पार्टीको दल दर्ता रोक्न माग गर्दै आयोगमा निवेदन
काठमाडौं । राष्ट्रिय जनता पार्टी (राजपा) नेपाल र समाजवादी पार्टी एकता भइ बनेको जनता समाजवादी पार्टीको दल दर्ता प्रकृया रोक्न निर्वाचन आयोगमा निवदेन परेको छ । राष्ट्रिय युवा संघ नेपालका अमित लामा र विपिन ढकालले नेपाललाई ‘बहु राष्ट्रिय राज्य’ कायम गर्ने उद्देश्य राखेको पार्टीको दल दर्ता प्रकृया रोक्न आयोगमा निवेदन दिएका हुन् ।
दुबै दलको सहमति पत्रमा उल्लेख भएको ‘बहु राष्ट्रिय राज्य’ भन्ने व्यहोरा नेपालको संविधान विपरित भएको उल्लेख गर्दै दल दर्ता प्रकृया रोक्न निवेदन दिइएको अधिवक्ता ढकालले जानकारी दिएका छन् ।
युवासंघ नेपालका सह संयोजक रमेश पौडेलले जातिय रुपमा समाज विभाजित गर्ने, देशलाई खण्डखण्ड गरेर टुक्र्याउने चलखेल भइरहेकाले त्यसलाई रोक्न पनि दर्ता प्रकृया रोक्न माग गरेको बताए । बिहीबार राष्ट्रिय जनता पार्टी नेपाल र समाजवादी पार्टी एकता भई बनेको ‘जनता समाजवादी पार्टी नेपाल’ निर्वाचन आयोगमा दर्ताका लागि निवेदन दिएको छ ।
