काठमाडौं । नेपाली कम्युनिस्ट पार्टी(नेकपा)की सांसद बलावती शर्माले पछिल्ला दिनहरूमा देशमा भइरहेका घटनाप्रति सरकार गम्भीर बन्नुपर्ने बताएकी छन् ।
मंगलबारको प्रतिनिधिसभा बैठकमा सांसद शर्माले सुनसरीको देवागञ्ज घटनापछि मधेशका विभिन्न क्षेत्रमा फैलिएको साम्प्रदायिक तनावप्रति चिन्ता व्यक्त गरिन् । उनले राजनीतिक दल, नागरिक समाज, सरकार तथा सम्बन्धित संघ–संस्थाको पहलका कारण अवस्था नियन्त्रणउन्मुख भएको उल्लेख गरिन् ।
उनले घटनाको सत्यतथ्य छानबिन गरी दोषीमाथि कारबाही गर्न माग गरिन् ।
सांसद शर्माले संकटका बेला प्रधानमन्त्रीको सक्रिय उपस्थितिको अपेक्षा जनताले गरेको भएपनि त्यसअनुसारको भूमिका नदेखिएको आरोप लगाइन् ।
उनले भनिन्,‘सदनले मात्र होइन, आम नेपाली जनता अप्ठ्यारो र दुःख–सुखमा अभिभावकका रूपमा प्रधानमन्त्रीको भौतिक उपस्थिति खोजेका छन्। तर प्रधानमन्त्री सामाजिक सञ्जाल र स्टाटसमै सीमित हुनुभएको छ ।’
उनले विधिको शासनको कुरा गर्ने सरकारले स्वतन्त्र न्यायपालिकामा हस्तक्षेप गरेको आरोप पनि लगाइन् । उनले सरकारमाथि न्यायपालिकालाई प्रभावित पार्ने प्रयास भएको दाबी गर्दै त्यसप्रति गम्भीर ध्यान दिन आग्रह गरिन्।
‘विधिको शासन कुरा गर्ने सरकारले स्वतन्त्र न्यायपालिकामा हस्तक्षेप गरेर हुर्मत लिने काम गरेको छ,’ उनले भनिन् ।
प्रतिक्रिया