उपनिर्वाचनले दुईदलीय व्यवस्थातिर लैजाने कांग्रेस र एमालेका नेताहरूको सोच खण्डित गरेको माओवादीको निष्कर्ष
काठमाडौं । माओवादी केन्द्रमा प्रवेश गर्नेलाई उचित स्थान दिने निर्णय गरेको छ । शुक्रबार बसेको स्थायी कमिटी बैठकले यसअघि माओवादीमा प्रवेश गर्ने नेता तथा कार्यकर्ताले जिम्मेवारी नपाएको निष्कर्ष निकाल्दै अब भने क्षमताका आधारमा उचित स्थान दिने निर्णय गरेको हो ।
माओवादी केन्द्रले प्रधानमन्त्री केपी शर्मा ओलीको चीन भ्रमण सफल नभएको निष्कर्ष निकालेको माओवादी प्रवक्ता अग्निप्रसाद सापकोटाले जानकारी दिए ।
त्यस्तै बैठकले उपनिर्वाचनले दुईदलीय व्यवस्थातिर लैजाने कांग्रेस र एमालेका नेताहरूको सोच खण्डित गरेको निष्कर्ष निकालेको छ ।
सापकोटाले भने, ‘कांग्रेस–एमालेले दुईदलीय व्यवस्थातिर लैजाने सोच, तयारी गरेका थिए । चुनावी नतिजाले त्यसलाई खण्डित गरेको छ ।’
त्यस्तै, बैठकले केन्द्रीय समिति बैठक पुस २१ गते बस्ने गरी मिति तय गरेको छ । यसअघि पुस २ गतेदेखि सुरू हुने भनिएको बैठक खबरदारी सभा र पालीका सम्मेलन मंसिर मसान्तभित्र सम्पन्न हुन नसकेकाले केन्द्रीय समिति बैठक पुस २१ गतेदेखि बस्नेगरी तय भएको प्रवक्ता सापकोटाले बताए । केन्द्रीय समितिको तयारीका लागि स्थायी कमिटी बैठक पुष १८, १९ र २० गते बस्ने उनले बताए ।
