निजी स्वास्थ्य संस्थाले स्वास्थ्यकर्मीलाई सरकारी सरह सेवा सुविधा दिनुपर्ने
काठमाडौं । स्वास्थ्य तथा जनसंख्या मन्त्रालयले निजी स्वास्थ्य संस्थाहरूमा कार्यरत सबै नर्सिङ एवं स्वास्थ्यकर्मीहरूको न्यूनतम पारिश्रमिक सरकारी सरह हुने भएको छ ।
स्वास्थ्य तथा जनसंख्या मन्त्री प्रदीप पौडेलद्वारा सार्वजनिक प्रतिबद्धता भएबमोजिम मेडिकल कलेज तथा स्वास्थ्य संस्थामा कार्यरत नर्सिङ तथा स्वास्थ्यकर्मीको न्यूनतम पारिश्रमिक र सेवा सुविधा कम्तिमा सरकारी सरह हुने गरी लागू गर्ने निर्णय स्वास्थ्य तथा जनसंख्या मन्त्रालयले गरेको हो ।
साथै, अब सबै मेडिकल कलेज तथा स्वास्थ्य संस्थाले तोकिएको समयभन्दा बढी काम गर्दा अतिरिक्त भत्ताको व्यवस्थासमेत लागू गर्नुपर्ने भएको छ ।
मन्त्रालयले बिहीबारको सचिवस्तरीय निर्णय गर्दै देशभरका प्रतिष्ठान सरकारी अस्पताल, मेडिकल कलेज र सामुदायिक निजी अस्पताललाई पत्र लेख्दै स्वास्थ्यकर्मीको सेवा सुविधा व्यवस्था गर्न आग्रह गरेको हो । नर्सिङ लगायतका अन्य स्वास्थ्यकर्मीहरूको पारिश्रमिक बैकिङ प्रणालीबाट मात्र उपलब्ध गराउन पनि पत्रमा भनिएको छ ।
