उपत्यका प्रवेश गर्ने नाकामा सेना परिचालन गर्न काठमाडौंका प्रमुख जिल्ला अधिकारीको सुझाव
काठमाडौं । काठमाडौं, भक्तपुर र ललितपुरका प्रमुख जिल्ला अधिकारीहरुले उपत्यका प्रवेशमा थप कडाई गर्नुपर्ने बताएका छन् । संसदको शिक्षा तथा स्वास्थ्य समिति अन्तर्गतको उपसमितिको आइतबारको बैठकमा सहभागी तीनै जिल्लाका प्रमुख जिल्ला अधिकारहरुले उपत्यका प्रवेश गर्ने र बाहिरिने मानिसहरुको आवागमनमा थप कडाई गर्नुपर्ने बताएका हुन् ।
काठमाडौं जिल्लाका प्रमुख जिल्ला अधिकारी जनकराज दाहालले उपत्यका प्रवेश गर्ने पाँच वटै नाकामा सेना परिचालन सुझाव दिए । उनले अहिले पनि दैनिक दुई हजार भन्दा बढी उपत्यका भित्रिरहेका भन्दै नाकालाई ठप्प पार्न नसकिने बताए । विभिन्न ढुवानीका साधनमार्फत मानिसहरुको आवतजावत भइरहेकाले त्यसलाई कडाई गर्न सेना परिचालन गर्नुपर्ने बताए ।
बैठकमा ललितपुरका प्रमुख जिल्ला अधिकारी नारायणप्रसाद भट्टले भने दशैंसम्म निषेधाज्ञालाई निरन्तरता दिनुपर्ने बताएका थिए । चाडपर्वको समयमा मानिसहरुको आवागमन बढ्ने भएकाले त्यसलाई रोक्न अहिलेदेखि नै केही क्षेत्रलाई सञ्चालन गर्न दिदै जनजीवन सहज बनाई निषेधाज्ञाको अवस्थालाई निरन्तरता दिनुपर्ने बताए ।
