विदेशबाट उद्धार गरी ल्याइएका नेपालीलाई गन्तव्यसम्म पुर्याउन पनि पहुँचका सवारीसाधनलाई मात्रै अनुमति !
काठमाडौं । विदेशबाट उद्धार गरेर स्वदेश ल्याइएका नेपालीलाई गन्तव्यसम्म पुर्याउन सरकारले केही कम्पनीका गाडीलाई मात्र अनुमति दिएको भन्दै यातायात व्यवसायीहरुले विरोध गरेका छन् ।
होल्डिङ सेन्टरबाट देशका बिभिन्न स्थानमा नेपालीहरुलाई पुर्याउन पहुँच भएका व्यक्तिका कम्पनीका गाडीलाई मात्र अनुमति दिइएको भन्दै उनीहरुले विरोध जनाएका हुन् । विदेशबाट उद्धार गरी ल्याइएकालाई निश्चित समयसम्म होल्डिङ सेन्टरमा राखेपछि होल्डिङ सेन्टरबाट प्रदेश र स्थानीय तहसम्म पुर्याउने काम पनि सरकारले गर्दै आएको छ ।
सो क्रममा सवारी भाडा पनि लिने गरिएको छ । मंगलबार काठमाडौंका बिभिन्न होल्डिङ सेन्टरमा पुगी केही व्यवसायीहरुले आफूहरुको सार्वजनिक सवारीसाधनलाई पनि प्रयोगमा ल्याउनुपर्ने माग गरेका छन् । उनीहरुले पहुँचका भरमा कुनै कम्पनीका गाडीलाई मात्र सञ्चालन गर्न दिनु मान्य नहुने भन्दै विरोध जनाए ।
आफूहरुको विरोधपछि सम्बन्धित पक्षले छलफलमा बोलाएको उनीहरुले जानकारी दिएका छन् । यसअघि विदेशबाट उद्धार गरी ल्याइएका व्यक्तिहरुलाई गन्तव्यसम्म पुर्याउँदा सवारी भाडादरमा ठगी गरिएको गुनासो आएको थियो ।
