रुपन्देहीको तिलोत्तमाकी कोरोना संक्रमित महिलाको मृत्यु

बुटवल । रुपन्देहीमा कोरोना संक्रमणबाट थप एक महिलाको मृत्यु भएको छ । बुधबार राति कपिलवस्तुको तौलिहवाका ५० बर्षीय पुरुषको मृत्यु भएको १२ घण्टा नबित्दै कोरोना अस्पतालमा उपचाररत रुपन्देहीको तिलोत्तमाकी ७० बर्षीया महिलाको बिहीवार बिहान साढे १० बजे मृत्यु भएको हो ।

लुम्बिनी प्रादेशिक अस्पतालका अनुसार थाइराइड र उच्च रक्तचापको समेत बिरामी रहेकी उनको मृत्यु भएको हो । साउन २६ गते संक्रमण पुष्टि भएकी उनलाई होम आईसोलेसनमा बसिरहेकोमा स्वास्थ्यमा समस्या आएपछि साउन ३१ गते अस्पताल भर्ना गरिएको थियो ।

ती महिलालाई नै बुटवलमा प्लाज्मा थेरापिबाट पहिलो पटक उपचार शुरु गरिएको थियो । योसँगै रुपन्देहीमा कोरोना संक्रमणबाट मृत्यु हुनेको संख्या ७ पुगेको छ ।