उपत्यकामा क्वारेन्टाइनस्थल र आइसोलेशन केन्द्र निर्माणलाई तिव्रता दिइने
काठमाडौं । काठमाडौं जिल्ला कोरोना संकट व्यवस्थापन समितिले उपत्यकामा क्वारेन्टाइनस्थल र आइसोलेशन केन्द्र निर्माणलाई तिव्रता दिने निर्णय गरेको छ । काठमाडौंमा मंगलबार बसेको समिति बैठकले बिभिन्न विद्यालयलाई क्वारेन्टाइनस्थल बनाउने र पशुपति धर्मशालालाई पनि क्वारेन्टाइनस्थल र आइशोलेशन रुपान्तरण गरिने र अन्य स्थानको खोजी गर्ने निर्णय गरेको हो ।
बैठकले उपत्यका प्रवेशलाई थप कडाई गर्नुपर्नेमा जोड दिएको छ । विदेशबाट नेपाल आउने सवै व्यक्तिहरु पैसा तिरेर होटलमा क्वारेन्टाइनमा बस्न नसक्ने भएकाले पीसीआर परीक्षण गरेर आएका नेपालीहरुलाई घरमा नै पठाउने व्यवस्था गर्नुपर्नेमा समितिको जोड छ ।
त्यस्तै उपत्यकामा हाल जारी निषेधाज्ञालाई केही दिन लम्बाउनुपर्ने र त्यसलाई कडा रुपमा पालना गराउनुपर्नेमा बैठकले जोड दिएको काठमाडौंका प्रजिअ जनकराज दाहालले जानकारी दिए ।
त्यस्तै काठमाडौं महानगरका प्रमुख बिद्यासुन्दर शाक्यले उपत्यकामा क्वारेन्टाइनस्थल र आइसोलेशन निर्माणका लागि जिल्ला कोरोना संकट व्यवस्थापन समिति मार्फत नै कार्यलाई तिब्रता दिने बताए । समितिले उपत्यकामा पीसीआर जाँचलाई तिव्र रुपमा अघि बढाउने निर्णय गरेको छ ।
