‘निषेधाज्ञामा प्रधानमन्त्रीका हलुका टिप्पणी पनि निषेध रहुन्’
काठमाडौं । प्रमुख प्रतिपक्षी दल नेपाली कांग्रेसले निषेधाज्ञामा विगतमा जस्तो भ्रष्टाचार, सत्ताद्वन्द्व र प्रधानमन्त्रीका हलुका टिप्पणी पनि निषेध गर्न सुझाव दिएको छ । बिहीबार विज्ञप्ति जारी गरी प्रवक्ता विश्वप्रकाश शर्माले यसबीचमा सरकारलाई कोरोना निषेधको क्षमता बढाउन र युद्धस्तरमा काम गर्न सुझाव दिएका हुन् ।
विज्ञप्तिमा भनिएको छ, ‘लकडाउन या निषेधाज्ञा आफैंमा समाधान होइनन्, भन्ने पुष्टि हाम्रै निकट अतीतको एकसय बीस दिन लामो लक डाउनले गरिसकेकै छ । केवल रक्षात्मक रणनीति मात्रै हुन् लक डाउन र निषेधाज्ञा । कोरोना विरुद्धको संघर्षलाई चुस्त बनाउन यो स्थितिको उपयोग गर्ने अधिकतम क्षमता अब सरकारले प्रस्तुत गर्न सक्नुपरेको छ । नेपाली कांग्रेस आग्रह गर्दछ— विगतमा गरिएका कमजोरी र गल्तिहरुबाट पाठ सिकेर युद्धस्तरमा कार्य गर्ने स्थितिको विकास हाल जारी निषेधाज्ञाको समयमा गरियोस् ।’
