तनहुँको ऋषिङमा पहिरोले घर पुरिँदा एकै परिवारका पाँच वेपत्ता
दमौली । तनहुँको रिसिङ ८ भैसीकिलेमा गएराति गएको पहिरोमा परि एकै परिवारका पाँच जना वेपत्ता भएका छन् । प्रहरीका अनुसार राती करिब १ बजे घर माथिबाट पहिरो खस्दा आनबहादुर थापाको परिवारका पाँच सदस्य वेपत्ता भएका हुन् । घटनामा परी साहिला छोरा भेषबहादुर र भेषबहादुरकी श्रीमती नानुमाया, छोरी अमिषा महादेव र मनिसरा थापा वेपत्ता भएका छन् ।
आनबहादुरकी श्रीमती ज्योतिमाया थापालाई उद्धार गरेर उपचारका लागि पोखरा पठाइएको बताइएको छ । ऋषिङ प्रहरी चौकिका इन्चार्ज क्षेत्रबहादुर थापाले उद्दारको प्रयास भैरहे पनि पानी परिरहेकाले समस्या परेको जानकारी दिए ।
घटनास्थलमा गाउँपालिका अध्यक्ष राजेन्द्रकृष्ण श्रेष्ठसहितको टोली उद्धारका लागि पुगेको छ ।प्रहरी टोली राती नै पुगे पनि घर पुरै पहिरोले पुरेकाले उद्धारमा कठिनाई आएको प्रहरी सहायक निरिक्षक थापाले बताए । यता म्याग्दे ६ बेलौतीडाँडामा घरमा पहिरो खस्दा घाइते लक्ष्मी विकको उपचारका लागि ल्याइएकामा रत्नहरी अस्पतालमा ज्यान गएको प्रहरीले जनाएको छ ।
