‘कोरोना कहरमा प्रधानमन्त्रीलाई ५ करोड मूल्यको गाडी किन ?’
काठमाडौं । नेपाली कांग्रेसका सांसद डा. मिनेन्द्र रिजालले चिनियाँ कम्युनिष्ट पार्टीका नेताले सत्तारु नेकपालाई प्रशिक्षण दिएकोमा आपत्ति जनाएका छन् । प्रतिनिधिसभाको मंगलबारको बैठकको शून्य समयमा बोल्दै रिजालले विगतमा छिमेकी राष्ट्रसँगको विशिष्ट र कुटनीतिक सम्बन्धमा संवेदनशील हुन नसक्दा दुवैतर्फका नेता र दलहरु आलोचित हुन पुगेको भन्दै सत्तारुढ दलको ध्यानाकर्षण गराए ।
पछिल्लो समय चिनियाँ कम्युनिष्ट नेताहरु नेपालका सत्तारुढ दललाई प्रशिक्षण दिने र आन्तरिक झगडा मिलाउने काममा संलग्न हुनु अपाच्य रहेको बताए ।
उनले प्रधानमन्त्रीका लागि फोरजी सर्भेलेन्स सहितको गाडी खरिद प्रक्रियाका सम्बन्धमा गृहमन्त्रीको जवाफ माग गरेका छन् । रिजालले भने, ‘प्रधानमन्त्रीका लागि फोरजी सर्भेलेन्स सहितको ५ करोड मूल्यको गाडी खरिद प्रक्रिया कोरोनाको कहरमा फागुन देखि रोकिएको थियो । असार ३ देखि नेपाल प्रहरीले यो प्रक्रिया अघि बढायो भन्ने खबर एक राष्ट्रिय दैनिकमा आयो । माननीय गृहमन्त्री के यो साचो हो ? हो भने कोरोना रोकथाममा बेसार थेरापीको अलौकिक सफलताको उद्घोष पत्याएर बजेट खर्च गर्ने ठाउँ नपाईएला भन्ने डरले उल्फाको धन झैं फजुल खर्च गर्न सरकारी तयारी हो यो । जवाफ पाउँ ।’
