नागरिक र राजनीतिक दलको एकताले भौगोलिक अखण्डता स्थापित गर्छौं भन्ने स्पष्ट भएको छः प्रधानमन्त्री
काठमाडौं । प्रधानमन्त्री केपी शर्मा ओलीले राष्ट्रियताको विषयमा कसैलाई देवत्वकरण गर्न आवश्यक नभएको बताएका छन् । बुधबार प्रतिनिधिसभाको बैठकलाई सम्बोधन गर्दै प्रधानमन्त्रीले यो कुनै दल वा व्यक्ति विशेषको नभएकाले यो सबैको साझा मुद्दा भएको बताएका हुन् । उनले भने, “कसैले जस पाउला कि भनेर चिन्ता गर्नुपनि पर्दैन को जसबाट छुट्ला कि भन्ने चिन्ता मान्नु पर्दैन । ”
उनले संविधान संशोधनमा दलहरुले देखाएको एकता अभूतपूर्व भएको बताए । उनले संसद बाहिर रहेका राजनीतिक दल तथा नेपाली नागरिकको ऐक्यवद्धताको प्रशंसा गरे । दलीय अभ्यासमा यस्ता राष्ट्रिय एकता कहिले कहिले मात्र देख्न पाइने भन्दै उनले हाम्रो संसद यस मामिलामा अत्यन्तै गम्भीर रहेको बताए ।
उनले परेका बेला राष्ट्रका सामु आएका चुनौति सामना गर्न नेपाली जनता र राजनीतिक दलहरु जिम्मेवार हुने कुरा यसबाट स्पष्ट भएको बताए । यस मामिलामा सिंगो देशलाई एकतावद्ध भएर संसद देशलाई हाँक्न सक्षम छ भन्ने देखाएको समेत बताए । अप्ठ्यारो बेलामा राष्ट्रिय एकतालाई प्रदर्शन गर्ने चरित्रलाई उजागर पारेको बताए । उनले यसबाट हाम्रो भौगोलिक अखण्डता स्थापित गर्छौं भन्ने स्पष्ट भएको उल्लेख गरे ।
प्रधानमन्त्रीले कोरोना रोकथाम, नियन्त्रण तथा उपचारमा भएको खर्चको हिसाब प्रक्रिया संगत आउने भएकाले अनियमितता हुनेमा शंका नगर्न आग्रह गरेका छन् । प्रधानमन्त्रीले अनियमिता हुनेमा शंका नगर्न आग्रह गरेका हुन् । उनले महामारीको संकटमा कसैले भ्रष्टाचार गरेको पाईए सरकारले कानुनी कारवाही गर्ने बताए ।
प्रधानमन्त्रीले अरुलाई लाञ्छना लगाउने र सधै अनियमितता भयो भन्ने प्रवृतिलाई बढावा नदिन पनि आग्रह गरेका छन् । प्रधानमन्त्रीले पछिल्लो समय भ्रष्टाचारमा संलग्न जोसुकैलाई पनि कारवाही हुने गरेको भन्दै पहिला त्यसो नभएको भन्दै प्रतिपक्षी दलप्रति व्यंग्य गरे ।
उनले भने, ‘अनियमितता भयो भन्ने र लाञ्छना लगाउने प्रवृत्ति पनि देखिन्छ । त्यो प्रवृत्तिमा नबग्न अनुरोध गर्दछु । सरकारले कुनै पनि प्रकारको अनियमितता सहदैन र छानविन गर्छ कारवाही गर्छ अनि कानुनको कठघरमामा उभ्याउछ र दोषी भएको पाईएमा कारवाही गर्छ।’ प्रधामन्त्रीले कोरोना सबैको साझा शत्रु भएकाले यसको नियन्त्रणका लागि भएका कार्यका बारेमा आएका आलोचनाहरुलाई आफूले सकारात्मक रुपमा लिएको बताए ।
उनले आलोचनाबाट सुधार गर्दै अघि बढ्ने पनि बताए । उनले भारतबाट नागरिकहरु फर्कने क्रम बढेपछि संक्रमण बढ्ने क्रम बाँध फुटेर बाढी आएको जस्तै भएकाले केही समस्या आएको बताए । उनले नेपाल फर्कनै पर्ने व्यक्तिलाई फर्काउने व्यवस्था मिलाईएकाले क्रमैसंग ल्याईने बताए ।
