हामीले राखेको वार्ता प्रस्तावलाई भारतले वेवास्ता गर्दा अचम्मित छौंः परराष्ट्रमन्त्री
काठमाडौं । परराष्ट्रमन्त्री प्रदीप ज्ञवालीले लिम्पियाधुरा, लिपुलेक र कालापानी क्षेत्रको भूमि फिर्ता भएपछि मात्रै त्यस क्षेत्रमा प्रशासनिक, सुरक्षा र विकास सम्बन्धी काम अगाडि बढाइने बताएका छन् । प्रतिनिधिसभाको मंगलबारको बैठकमा मन्त्री ज्ञवालीले भूमि फिर्ता भएपछि मात्रै लिम्पियाधुरा, लिपुलेक र कालापानी क्षेत्रमा प्रशासनिक, सुरक्षा र विकास सम्बन्धी काम अगाडि बढाइने बताएका हुन् ।
मन्त्री ज्ञवालीले भारतसाँग वार्ताका लागि सरकारले ताकेता गरिरहेको जानकारी दिए । चीनसँग वार्ता गरेको भारतले नेपालसँग वार्ताका लागि चासो नदेखाएकोमा आफूहरु अचम्मित भएको बताए । उनले भने, दुई देशका सेनाबीच धकेलाधकेलको स्थितिलाई समान्यीकरण गर्दै वार्ता भएको छ । तर वार्ताको लागि ताकेता गर्ने हामीहरुको प्रस्तावलाई वेवास्ता गरिएको छ । मलाई विश्वास छ वार्ता हुन्छ हामी आशावादी छौं ।’
उनले नेपालले अतिरिक्त भौगोलिक आकांक्षा पालेको नभई सुगौली सन्धीको सीमा भित्रको भूभागमा मात्रै हक खोजेको स्पस्ट पारे । उनले नेपाल–भारत सीमामा रहेका स्तम्भको पुनस्र्थापना, निर्माण र मर्मत गर्ने काम भइराखेको जानकारी दिए ।
अमेरिकी परियोजना एमसीसीका सम्बन्धमा नेपालमा केही मानिसहरुलाई मनको बाघले खाइरहेको उनले टिप्पणी गरे । उनले नेपाल कुनैपनि सैन्य रणनीतिमा साझेदार नहुने गरी सबै मित्रराष्ट्रसँग विकास साझेदारीलाई अगाडि बढाइने स्पष्ट पारे ।