जनस्वास्थ्य प्रयोगशालाका निर्देशकमाथि यस्तो दुव्र्यवहार !
काठमाडौं । लकडाउनको सुरुको समयमा प्रहरीले नागरिकलाई अमानवीय तवरले कुटपिट गरेका थुप्रै दृष्य सार्वजनिक भए । त्यसपछि प्रहरीको सर्वत्र आलोचना भयो । यतिसम्मकी औषधि किन्न गएका, विरामी, खाद्य सामग्री खरिद गरी फर्किएका नागरिकलाई प्रहरीले अमानवीय तवरले कुटपिट गर्ने गरेको थियो ।
तर प्रहरीका पनि चेत खुलेर होला अनि सर्वत्र विरोध भएपछि अहिले कुटपिटका दृष्य देखिन छाडेको छ । तर पछिल्लो समय बाहिरबाट आउने मानिसलाई गाउँ टोल छिर्न नदिने भन्दै स्थानीयको नाममा टोले गुण्डा सक्रिय हुन थालेका छन् । पुलमा बार लगाउने, पर्खाल लगाउने, सवारीसाधन जाँच गर्ने काम उनीहरुबाट हुन थालेको छ । उनीहरुको रवैया हेर्दा सरकार अब टोले गुण्डाको हातमा गयो कि भन्ने आभाष हुने खालका घटना सार्वजनिक हुन थालेका छन् । एउटा भिडियो सामाजिक संजालमा अहिले भाइरल भएको छ ।
बागमती प्रदेशको जनस्वास्थ्य प्रयोगशालाका निर्देशक नारायण कार्की चढेको गाडीलाई नागढुंगामा उत्तम कार्की बताउने युवाको समूहले रोकेर उनीहरुले गरेको व्यवहार हेर्दा त्यस्तै लाग्छ । निर्देशक कार्कीले आफू राष्ट्रिय जनस्वास्थ्य प्रयोगशाला टेकुमा कोरोना परीक्षणका लागि कीट लिन आएको भन्दा समेत नछाडेर झोला जाँच गरेका छन् ।
को हुन् ती उत्तम कार्की प्रहरीको जसरी जाँच गर्ने ? कसले दियो तिनलाई यो अधिकार ? यस्ता गतिविधिले स्वास्थ्यकर्मीको मनोबल पक्कै गिर्नेछ । कोरोना नियन्त्रणका नाममा कुनैपनि स्थानमा यस्तो काम नहोस् । यिनलाई तत्काल कारबाही होस् ।
