कोरोनाको त्रासः संसद बैठक रोक्न र विद्यालय बन्द गर्न कांग्रेस सांसदको माग
काठमाडौं । नेपाली कांग्रेसका सांसदहरुले कोरोनाभाइरस प्रकोपको रुपमा विश्वभर फैलिरहेकाले संसद बैठक रोक्न र विद्यालय बन्द गर्न माग गरेका छन् ।
बिहीबारको प्रतिनिधिसभा बैठकमा नेपाली कांग्रेसका सांसद भीमसेनदास प्रधानले कोरोनाभाइरस विश्वभर प्रकोपका रूपमा फैलिरहेको भन्दै संसद बैठक रोक्न माग गरेका हुन् ।
उनले भने, ‘सरकारले अहिलेसम्म संसदलाई निरन्तर चलाई राख्नुको कुनै तुक छैन। जहाँ भीडभाड हुन्छ, स्कुल, बस, तुरुन्त बन्द गर्नुपर्यो । अमेरिका, युरोप त्रसित छन्, मास ग्यादरिङ हुने ठाउँलाई रोक्न सकेन भने त्यसबाट उत्पन्न हुने परिस्थितिलाई रोक्न सकिन्न । सरकार चाँडै एक्सनमा जानुपर्छ।’
उनले विश्व स्वास्थ्य संगठनले पनि जोखिममा रहेको बताइरहँदा नेपाल सरकारले कुनै तयारी नगरेको पनि आरोप लगाए । यस्तै, कांग्रेसका अर्का सांसद भरत शाहले पनि कोरोना भाइरसको त्रास बढेकाले संसद धेरै दिन संचालन गर्न नहुने बताए ।
