चीनका लागि प्रस्तावित राजदूत पाण्डेविरुद्ध उजुरी आह्वान
काठमाडौं । संसदीय सुनुवाई विशेष समितिले चीनका लागि प्रस्तावित राजदूत महेन्द्र बहादुर पाण्डेविरुद्ध उजुरी आह्वान गरेको छ । बुधबार सिंहदरबारमा बसेको समितिको बैठकले पाण्डेविरुद्ध उजुरी आह्वान गरेको हो ।
समिति सभापति लक्ष्मणलाल कर्णले मन्त्रिपरिषद्बाट चीनका लागि आवासीय र उत्तर कोरिया तथा मंगोलियाको गैरआवासिय राजदूतका लागि प्रस्ताव गरिएका पाण्डे विरुद्ध उजुरी आह्वान गरिएको जानकारी दिए ।
समिति सदस्यहरुलाई पाण्डेको व्यक्तिगत विवरण वितरण गरिएको र गुनासो तथा सूचना संकलनका लागि उजुरी आह्वान गरिएको बताए । फागुन १८ गते बसेको मन्त्रिपरिषद बैठकले चीनका लागि नेपाली राजदूत लीलामणि पौडेललाई फिर्ता बोलाउने निर्णय गरेको थियो ।
पौडेललाई फिर्ता बोलाएर पाण्डेको नाम सिफरिस भएको थियो । समितिले नाम अनुमोदन गरेपछि पाण्डेको राजदूत नियुक्तिको बाटो खुल्ने छ ।
