शेखरसँग प्रधानमन्त्रीको गुनासोः पार्टीका नेताहरुबाटै असहयोग भयो
काठमाडौँ । नेपाली कांग्रेसका नेता डा. शेखर कोइराला र प्रधानमन्त्री केपी शर्मा ओलीबीच भेटवार्ता भएको छ । कोइरालालाई भेटका लागि प्रधानमन्त्रीले बालुवाटार बोलाएका थिए । प्रधानमन्त्री ओली र नेता कोइरालाबीच देशको पछिल्लो राजनीतिक अवस्थाबारे एक घण्टा बढी कुराकानी भएको बताइएको छ । कोइरालाका स्वकीय सचिव दिनेशचन्द्र थपलियाका अनुसार प्रधानमन्त्रीसँगको भेटमा सेक्युरिटी प्रिन्टिङ प्रेस खरिदमा गोकुल बाँस्कोटाको अडियो प्रकरणदेखि संविधान संशोधनसम्मका विषयमा कुराकानी भएको थियो ।
कोइरालाले कुनै व्यक्तिको अनुहार हेरेर संविधान संशोधन गर्दा गलत नजिर बस्ने भएकाले त्यसो नगर्न प्रधानमन्त्रीलाई सुझाव दिएका थिए । जवाफमा प्रधानमन्त्रीले प्रतिपक्षका रुपमा कांग्रेसले आफ्नो विरोध गर्नु स्वाभाविक भए पनि आफ्नै पार्टीका नेताहरुबाट असहयोग भएको गुनासो कोइरालासँग गरेका थपलियाले जानकारी दिए ।
वामदेव गौतमलाई राष्ट्रिय सभा सदस्यमा मनोनित गर्ने र संविधान संशोधन गर्ने कुराले नेकपाभित्र ठूलो विवाद उत्पन्न भएको छ । नेकपा सचिवालयका अधिकांश सांसदले राष्ट्रपतिबाट मनोनित राष्ट्रिय सभा सदस्य युवराज खतिवडाको ठाउँमा उपाध्यक्ष वामदेव गौतमलाई लैजान चाहेका छन् । ओली भने जुनसुकै हालतमा युवराज खतिवडालाई नै निरन्तरता दिन चाहन्छन् ।
बुधबार बसेको सचिवालय बैठकले गौतमलाई राष्ट्रियसभामा लैजाने निर्णय गरेको थियो । बैठकले निर्णय गरेलगत्तै प्रधानमन्त्रीले ओलीले गौतमलाई कुनै हालतमा राष्ट्रियसभामा नलैजाने बताएपछि विवाद थप उत्कर्षमा पुगेको हो । गुट बनाएर आफूलाई अप्ठ्यारोमा पार्न लागिएको भन्दै ओली शशंकित भएका छन् ।
