गणेश थापा आरसिटी क्लबमा
काठमाडौं । अन्र्तराष्ट्रिय फुटबल महासंघ फिफाबाट १० वर्षे प्रतिवन्ध सहितको कारवाहीमा परेपछि नेपाली फुटवलबाट ओझेल परेका अखिल नेपाल फुटवल संघ एन्फाका पूर्व अध्यक्ष गणेश थापाको पुनः फुटबल गतिविधिमा पुनरागमन भएको छ ।
अघिल्लो साता आफ्नो खेल जीवन संवन्धी आत्मा कथा लिएर आउन लागेको भन्दै लामो समयपछि पत्रकार सम्मेलनमा उपस्थित थापा पछिल्ला दिनमा क्लवका कार्यक्रमहरुमा पनि सामेल हुन थालेका छन ।
२०७६ को तिहार प्रारम्भको पहिलो दिन पारेर थापा एक पुरानो र चर्चित क्लव आरसिटीको शुभकामना कार्यक्रममा पुराना खेलकर्मी तथा फुटबलरहरुका साथमा उदाएका छन । कात्तिक ९ गते शनिवार आरसीटी क्लबद्वारा आयोजित दशै तथा शुभ दीपावलीको उपलक्ष्यमा आयोजित चियापान कार्यक्रममा थापा सहभागि भएका छन ।
आफूलाई क्लवले निम्तो दिए अनुसार अफू सहभागि भएको भन्दै उनले फेसबुकमा लेखेका छन, मलाई निमन्त्रणा गरी न्यानो माया दिनुभएकोमा आरसीटी क्लबका सम्पूर्ण पदाधिकारी साथीहरुलाई हार्दिक धन्यवाद दिन चाहन्छु !
थापाले अगाडि लेखेका छन, हुन त म यस क्लबबाट धेरै लामो सम्म नखेलेको भए तापनि जुन आत्मीयता देखाउनुभयो, यसबाट म धेरै नै सम्मानित भएको महसुस गरे ! आरसीटी क्लबको उत्तर उत्तर प्रगतिको पनि कामना गर्न चाहन्छु ! थापाले त्यस अवसरमा नयाँ पुराना सबै फुटबलर र क्लव पदाधिकारीहरुसंग फोटोसेसन समेत गरेका थिए । लामो समयपछि थापा यसरी सार्वजनिक कार्यक्रममा देखिदा उनीसंग फोटो खिच्ने धेरै सहभागिले रहर गरेका थिए ।
