रास्वपाद्वारा प्रत्यक्ष निर्वाचित प्रधानमन्त्रीको प्रस्ताव, महाधिवेशन वैशाखमा

काठमाडौं । राष्ट्रिय स्वतन्त्र पार्टी (रास्वपा)ले महाधिवेशन आगामी वैशाख अन्तिम साता गर्ने भएको छ । पार्टीको राष्ट्रिय भेला समापन समारोहमा रास्वपाका सभापति रवि लामिछानेले आगामी वैशाख २५, २६ र २७ गते महाधिवेशन गर्ने घोषणा गरेका हुन् । साथै उनले केन्द्रीय समितिलाई महाधिवेशन आयोजक समितिमा रूपान्तरण गरिएको घोषणा समेत गरे ।

त्यस्तै लामिछानेले जनताको कुरा सुन्न ‘महाकाली–मेची जनयात्रा अभियान’को पनि घोषणा गरे । सभापति लामिछानेले संविधान संशोधनमार्फत प्रत्यक्ष निर्वाचित प्रधानमन्त्री बनाउनुपर्ने प्रस्ताव गरेका छन् ।

उनले प्रदेशसभा खारेज गर्दै स्थानीय तहका जनप्रतिनिधि सम्मिलित प्रदेश परिषद्लाई नै विधायकी अधिकार दिन सकिने उन्नत विकल्पबारे छलफल सुरु गरिने बताए । त्यस्तै, सातवटा प्रदेश कायम राख्दै स्थानीय पालिकाहरूको सङ्ख्या भने ५०० भन्दा मुनि झार्नुपर्ने प्रस्ताव गरेका छन् ।