दुनियाँले सुन्नेगरी भन्न चाहन्छु, भ्रष्टाचार गर्दैनौँ र सहन्नौँ पनिः प्रधानमन्त्री ओली
काठमाडौं । प्रधानमन्त्री केपी शर्मा ओलीले २०४६ सालपछिको पुस्ता पहिलोपटक चरम निराशामा रहेको बताएका छन् । प्रतिनिधिसभाको आइतबारको बैठकमा विश्वासको मत माग्दै प्रधानमन्त्रीले राजस्व लक्ष्यको ७६ प्रतिशत मात्र उठेको बताए ।
कम राजस्व उठेकाले अर्थतन्त्रको अवस्था देखाएको उनले बताए । उनले बैंकमा पैसा थुप्रेको र लगानी गर्ने व्यक्तिहरू तयार नभएका बताए । उनले सरकार थालेको काम सकियो भनेर सुनाउन आतुर रहेको बताए ।
उनले भने, ‘सरकार स्टन्टबाज भयो, सरकार थुन्ने अनि सुन्ने भयो भन्ने गुनासो बोेकेर धाउँदैधाउँदै काम गर्न पाएनन् ।’
उनले निराशा हटाउन, आशाको सञ्चार गर्न र देशलाई तीव्र आर्थिक दिशामा लैजान अहिलेको सरकार बनेको बताए । उनले भने, ‘मलाई सबभन्दा डर लागेको कुरा देशप्रति आम जनताको भरोसा टुटेको स्थिति । तिनको मनोबल नराम्ररी गिरेको अवस्था ।’
उनले सरकारले भ्रष्टाचार नगर्ने र नसहने पनि बताए । उनले भने, ‘एउटा कुरा खुलस्त भन्न चाहन्छु, दुनियाँले सुन्नेगरी भन्न चाहन्छु, भ्रष्टाचार गर्दैनौँ। भ्रष्टाचार सहन्नौँ। कसैलाई भ्रष्टाचार गर्न दिन्नौँ । भ्रष्टाचार र अख्तियार दुरुपयोगसँग जोडिएका छानबिन गर्छौँ। जो कोही भ्रष्टाचारी उपर कानुनी कारबाही अघि बढाउँछौँ।’
प्रधानमन्त्रीले भ्रष्टाचारी एक दिन कानुनको कठघरामा पुग्नेमा आफू विश्वस्त रहेको बताए ।
