संसदको अवरोध हटाउन एकीकृत समाजवादीले प्रधानमन्त्री र कांग्रेससँग छलफल गर्ने
काठमाडौँ । नेकपा एकीकृत समाजवादीले संसदको गतिरोध हटाउन प्रधानमन्त्री पुष्पकमल दाहाल प्रचण्ड र प्रमुख प्रतिपक्षी दल नेपाली कांग्रेससँग छलफल गर्ने भएको छ।
पार्टी सचिवालयको बिहीबार बसेको बैठकले संसदको गतिरोध हटाउन पहल गर्ने निर्णय गरेको हो । पार्टी प्रवक्ता जगन्नाथ खतिवडाले आफूहरुले प्रधानमन्त्री, गृहमन्त्री र कांग्रेससँग छलफल गर्ने निर्णय गरेको जानकारी दिए ।
उपप्रधान तथा गृहमन्त्री रवि लामिछानेमाथि सहकारी प्रकरणमा संसदीय छानबिन हुनुपर्ने भन्दै कांग्रेसले लगातार संसद अवरोध गर्दै आएको छ। दलहरूबीच संसदीय समिति गठन गर्ने सहमति भए पनि त्यसको कार्यदेशमा सहमति नहुँदा समिति पनि गठन भएको छैन।