निराधार हल्ला चलाएर असंवैधानिक ढंगले रातारात पार्टी विभाजन गरियो, कानुनी लडाइँ लड्छौंः अध्यक्ष यादव
काठमाडौं । जनता समाजवादी पार्टी नेपालका अध्यक्ष उपेन्द्र यादवले जसपा र नेकपा एकीकृत समाजवादीले कांग्रेससँग मिलेर वर्तमान सरकार ढाल्ने भयो भन्ने भ्रमपूर्ण र निराधार हल्ला चलाएको बताएका छन् ।
बुधबार पत्रकार सम्मेलन गरी अध्यक्ष यादवले आफू विदेश गएको मौका छोपी निराधार हल्ला चलाएर गैरकानूनी र असंवैधानिक ढंगले रातारात पार्टी दर्ता भएको घोषणा गरेको बताए ।
उनले भने, ‘म विदेश गएको बेला जसपा र नेकपा एकीकृत समाजवादीले कांग्रेससँग मिलेर यो सरकार ढाल्ने भो भनेर हल्ला चलाइयो । त्यो हल्ला निराधार र कपोलकल्पित हल्ला हो । निराधार त्यही हल्लालाई कसैकसैले मौका छोपेर पार्टी भित्र महाधिवेशनको तयारी भइरहेको बेला व्यक्तिगत स्वार्थबाट प्रेरित व्यक्तिले हल्लाको कारणले फाइदा उठाउने गरी पार्टी फुटाएको घोषणा गरे र निर्वाचन आयोगमा गैरकानुनी रुपमा असंवैधानिक ढंगले रातारात पार्टी दर्ता भएको घोषणा गरे रे । नेपालको इतिहासमा यति छिटो पार्टी दर्ताको प्रमाणपत्र दर्ता गरेको यो पहिलो पटक हो ।’
उनले आफू देश बाहिर रहेको बेला पार्टी विभाजन प्रधानमन्त्रीलाई भ्रममा परेको महसुस भएको बताए । उनले भने, ‘अमेरिकाबाट फर्किएलगत्तै प्रधानमन्त्रीलाई भेटें। जुन हौवा फिजाइयो, उहाँ पनि त्यो भ्रममा परेको भन्ने बुझियो ।’
उनले सरकारप्रति निरन्तर समर्थन रहने र बाँकी कसरी परिस्थिति विकास हुन्छ भन्नेमा निर्भर हुने बताए । उनले आफूले कार्यवाहक अध्यक्षको पद दिएकै व्यक्तिले पार्टी फुटाएर हिँडेको बताए ।
उनले लाखौँ पार्टी सदस्य र नेताहरू आफूहरुको समर्थनमा नै रहेको भन्दै ५/७ सांसदहरूलाई मन्त्री बनाइदिने प्रलोभनमा पारी खर्च गरेर भएपनि भेला पारेर पार्टी फुटाए भनेर गरेको जनआधार प्रचारले पार्टीलाई असर नपरी अझै सुदृढ भएर जाने विश्वस व्यक्त गरे ।
अध्यक्ष यादवले पार्टी विभाजनविरुद्ध कानुनी र राजनीतिक लडाइँ लड्ने पनि बताए । उनले भने, ‘नयाँ दल दर्ता असंवैधानिक छ । त्यसको कानुनी हैसियत छैन। त्यसविरुद्ध हामी अदालत जान्छौँ। कानुनी र राजनीतिक लडाई लड्छौँ।’
