माधव नेपाललाई गठबन्धनमा सहभागी हुन प्रचण्ड र ओलीको प्रस्ताव
काठमाडौं । नेकपा एमाले र नेकपा माओवादी केन्द्रले नेकपा एकीकृत समाजवादीलाई सत्ता समीकरणमा सहभागी हुन आग्रह गरेका छन् । मंगलबार साँझ एकीकृत समाजवादीका अध्यक्ष माधवकुमार नेपाललाई कोटेश्वरस्थित निवासमा पुगेका प्रधानमन्त्री पुष्पकमल दाहाल प्रचण्ड र एमाले अध्यक्ष ओलीले सत्ता समीकरणमा सहभागी हुन आग्रह गरेका हुन् ।
नेपालसँगको भेटमा प्रचण्ड र ओलीले विगतमा तितामिठा कुरालार्ई बिर्सेर नयाँ सत्ता समीकरणमा सहभागी हुन आग्रह गरेका थिए । अध्यक्ष नेपालले भने विगतमा आफूले धोका पाएको बताएका थिए । अध्यक्ष नेपालले ओली र प्रचण्डलाई समीकरणमा सहभागी हुने बारेमा कुनै निर्णय नदिएको एकीकृत समाजवादीका एक नेताले बताएका छन् । उनीहरु बाहिरिए लगत्तै राप्रपा अध्यक्ष राजेन्द्र लिङदेन नेपाल निवास पुगेका थिए ।
यसअघि सोमबार साँझ पनि प्रधानमन्त्री अध्यक्ष नेपाललाई भेट्न नेपाल निवास कोटेश्वर पुगेका थिए । माधव नेपाल यत्रो सत्ता समीकरणकाबारेमा आफूलाई जानकारी नदिएको भन्दै प्रचण्डसँग रुष्ट बनेका छन् ।
