एमालेले १० औं महाधिवेशनमा माधव नेपालबाहेकका शीर्ष नेतालाई बोलाउने
काठमाडौं । नेकपा एमालेले महाधिवेशनको उद्घाटन सत्रमा नेकपा (एकीकृत समाजवादी)बाहेकका पार्टीका शीर्ष नेतालाई बोलाउने भएको छ ।
बुधबार आयोजित पत्रकार सम्मेलनमा एमाले प्रचार विभाग प्रमुख योगेश भट्टराईले महाधिवेशनको उद्घाटन सत्रमा एकीकृत समाजवादीलाई नबोलाउने जानकारी दिएका हुन् ।
उनले एकीकृत समाजवादी विभिन्न राजनीतिक शक्तिहरुको अवैधानिक सम्बन्ध वा लसपसबाट जन्मिएकाले उसलाई नबोलाउने बताएका हुन् । उनले भने,‘ त्यो अवैध पार्टी हो । अवैध पार्टीलाई बोलाइरहनुपर्दैन ।’
दशौं महाधिवेशनमा विभिन्न मुलुकका पार्टी, मैत्रीपूर्ण सम्बन्ध रहेका पार्टी, दक्षिण एसियाका सत्तारुढ दल र विपक्षी दलहरु तथा आईक्याप (आईसीएपीपी)का स्थायी कमिटीका सदस्यहरुलाई निमन्त्रणा गरिएको भट्टराईले जानकारी दिए ।