मुख्यमन्त्रीको विश्वासको मतमाथि मतदान नगरी बागमती प्रदेशसभाको बैठक स्थगित
काठमाडौं । बागमती प्रदेशकी मुख्यमन्त्री अष्टलक्ष्मी शाक्यले पद जोगाउने नाममा आफूले कुनै पनि किसिमको सम्झौता गर्न नचाहेको बताएकी छन् । बिहीबार विश्वासको मत लिने क्रममा प्रदेशसभा बैठकमा मुख्यमन्त्री शाक्यले आफूलाई मुख्यमन्त्री पद जोगाउन विभिन्न प्रस्ताव आएपनि च्यूत भएर कुनै सम्झौता गर्न नचाहेको बताएकी हुन् ।
उनले आफ्नो छोटो शासनकालमा प्रदेशमा सुशासन सुधार गरेको र विकासको गतिलाई पनि तीव्र पारेको दाबी गरिन् । उनले भनिन्,‘हामीले हाम्रै पार्टीका अध्यक्ष केपी शर्मा ओलीले ल्याएको दल विभाजनसम्बन्धी अध्यादेशको विपक्षमा खरो उत्रिएका थियौँ । हामीले विरोध गरेपछि अध्यादेश फिर्ता भयो। तर अहिले विरोध गरेको भन्दा निकृष्ट ढंगले अध्यादेश ल्याइयो र दल फुटाइएको छ।’
भदौ दुई गते ठूलो दलको हिसावले मुख्यमन्त्री बनेकी शाक्यले २२ असोजमा प्रदेशसभाको सचिवालयमा विश्वासको मत लिन प्रस्ताव दर्ता गरेकी थिइन् । २४ असोजमा उनले प्रदेशसभाको बैठक विश्वासको मतको प्रस्ताव पेस गरेकी थिइन् ।
यसैबीच, मुख्यमन्त्री शाक्यको विश्वासको मतमाथि मतदान नगरी बागमती प्रदेशको प्रदेशसभा बैठक कात्तिक १० गतेसम्म स्थगित भएको छ । बिहीबारको बैठकमा मुख्यमन्त्री शाक्यले राखेको विश्वासको मतसम्बन्धी प्रस्तावमा छलफल सकिएपनि सभामुख सानुकुमार श्रेष्ठले कात्तिक १० गतेसम्मका लागि बैठक स्थगित गरेका छन् ।
