महन्थ ठाकुर वैकल्पिक सरकार गठनको विपक्षमा
काठमाडौं । नयाँ सरकार गठन विषयमा जनता समाजवादी पार्टीमा विवाद देखिएको छ । जसपाका अध्यक्ष उपेन्द्र यादव ओली सरकार विस्थापित गरी नयाँ सरकार गठनमा लागेका बेला अर्का अध्यक्ष महन्थ ठाकुले भने नयाँ सरकार गठन आफ्नो पार्टीको प्राथमिकता नरहेको बताएका छन् ।
सोमबार राति विज्ञप्ति जारी गरी अध्यक्ष ठाकुरले जसपा नेपाल सत्ता प्राप्तिभन्दा एजेण्डा सम्बोधनको विषयमा केन्द्रित रहेको बताएका हुन् । अर्का अध्यक्ष यादव पक्षले भने सोमबार प्रधानमन्त्रीको विश्वासको मतको विपक्षमा मत दिएको थियो भने ठाकुर पक्ष तटस्थ बसेको थियो ।
त्यसपछि माओवादी अध्यक्ष पुष्पकमल दाहाल प्रचण्ड र नेपाली कांग्रेसका सभापति शेरबहादुर देउवासँग संयुक्त विज्ञप्ति जारी गरी यादवले राष्ट्रपतिलाई बहुमतको सरकार गठनका लागि आह्वान गर्न आग्रह गरेका थिए ।
राष्ट्रपति विद्यादेवी भण्डारीले बहुमतको सरकार गठनका लागि सोमबार दलहरुलाई तीन दिनको समय दिइसकेकी छन् । जसपाभित्र नयाँ सरकार गठनमा विवाद देखिएपछि बहुमतीय सरकार गठनमा समस्या हुने देखिएको छ ।