अधिकार, जनशक्ति र बजेटका अभावका कारण परिणाममुखी काम गर्न नसकेको विभिन्न आयोगका पदाधिकारीको गुनासो
काठमाडौं । विभिन्न आयोगका पदाधिकारीहरुले पर्याप्त अधिकार, जनशक्ति र बजेटका अभावका कारण परिणाममुखी काम गर्न नसकिएको गुनासो गरेका छन् । मंगलबार बसेको रष्ट्रिय सभाको राष्ट्रिय सरोकार तथा समन्वय समितिको बैठकमा उनीहरुले आयोगले काम गर्न नसक्नुका पछाडि धेरै कारणहरु रहेका भन्दै सरकारको ध्यानाकर्षण गराइदिन आग्रह गरेका हुन् ।
छलफलमा मधेशी आयोगका अध्यक्ष डा. विजय कुमार दत्तले १८ महिनामा १० पटक सचिव परिवर्तन भएको बताए । उनले पदाधिकारी बिहीन हुँदा पनि नियमावलीको काम सकिएको, आन्तरिक कार्यबिधि निर्माण गरिएको उल्लेख गरेका छन् । उनले कार्यक्रम गर्न पनि बजेट र पूर्वाधारको अभाव भएको गुनासो गरे ।
त्यस्तै समावेशी आयोगका कार्यबहाक अध्यक्ष विष्णुमाया ओझाले आफू लामो समय कार्यबाहक अध्यक्षको रुपमा भएको गुनासो गरिन् । बैठक बस्नुपर्दा पनि एक्लै बस्नुपर्ने र आफ्नो कुरा आफैले मात्र सुन्नुपर्ने अवस्था रहेको भन्दै उनले आयोगलाई पूर्णता दिन आग्रह गरिन् ।
त्यस्तै महिला आयोगकी सचिव शान्ता अधिकारी भट्टराईले आयोग पदाधिकारी बिहीन हुँदा कुनै नीतिगत निर्णय हुन नसकेको बताइन् । आफूले कार्यालय प्रमुखको हैसियतले मात्र काम गर्नुपरेको भन्दै उनले कुनै अधिकार नहुँदा सेवामूलक काम गर्न नसकिएको बताइन् ।
उनले हेल्प लाइन पनि बन्द हुने अवस्थामा पुगेको बताइन् । महिला आयोगमा लामो समयदेखि एक अध्यक्ष र चार सदस्य पद रिक्त छन् । त्यस्तै मधेशी आयोगमा सदस्य पद रिक्त छन् भने समावेशी आयोग कार्यबाहक अध्यक्षको भरमा चलिरहेको छ ।
