‘उपसभामुखको पद यति लामो समयसम्म रिक्त रहँदा प्रतिपक्ष, बुद्धिजीवीहरू र कानुन व्यवसायी किन मौन ?’
काठमाडौं । नेपाली कांग्रेसका नेता डा. शेखर कोइरालाले रिक्त रहेको उपसभामुख पदलाई पूर्णता नदिएको भन्दै आपत्ति जनाएका छन् । सामाजिक संजाल फेसबुकमार्फत कोइरालाले उपसभामुख पदलाई पूर्णता दिन दवाव दिनुपर्ने बताएका हुन् ।
उनले लेखेका छन्, ‘नेपाली कांग्रेसले बिभिन्न संवैधानिक आयोगहरुमा भागबण्डा खोज्नुभन्दा संवैधानिक परिषदको (उपसभामुखको निर्वाचन) पुर्णतामा दवाव दिनुपर्ने होइन र ? परिषद सदस्य समेत रहेको उपसभामुखको पद यति लामो समयसम्म रिक्त रहँदा प्रतिपक्ष, बुद्धिजीवीहरू र कानुन व्यवसायी किन मौन ?’
उपसभामुखबाट शिवमाया तुम्बाहाङ्फेले गत माघ ६ गते राजीनामा दिएपछि सो पद रिक्त छ । संविधानमा सभामुख र उपसभामुख फरक पार्टीको हुनुपर्ने उल्लेख छ । सभामुख कृष्णबहादुर महराले राजीनामा दिएपछि उक्त पदमा नेकपाबाट अग्निप्रसाद सापकोटा नियुक्त भएका थिए ।