‘बाबुराम भट्टराई कामी भन्न किन नहुने ?’
काठमाडौं । पूर्वप्रधानमन्त्री डा. बाबुराम भट्टराईले जातीय विभेद अन्त्य गर्न सबैले आ–आफ्ना थर फेर्न प्रस्ताव गरेका छन् । प्रतिनिधिसभामा आइतबार भएको बजेटमाथिको छलफलमा भाग लिँदै भट्टराईले वर्णाश्रम व्यवस्था परिवर्तन गरेर श्रमको संस्कार निर्माण गर्नुपर्ने बताएका हुन् ।
भट्टराईले जातभातको विभेदले हामी सबैलाई गिज्याउन थालेको भन्दै परिवर्तन जरुरी भएको बताए । हालै पश्चिम रुकुममा अन्तर्जातीय प्रेममा रहेका नवराज विश्वकर्मासहितको कुटपीट गरी मारिएको र भेरी नदीमा हालिएको घटनाका सन्दर्भमा डा. भट्टराईले संसदमा यस्तो प्रस्ताव गरेका हुन् ।
उनले भने, ‘हामी सबैले थर बदलौं । सबैले थरमा दलित लेख्न थालौं । बाबुराम भट्टराई दलित, कामी लेखौं, बाबुराम कामी भन्न किन नहुने ? काम गर्नेलाई कामी त भन्छन् नि । । विश्वकर्मा लेखौं । यसले जातीय विभेद अन्त्य गर्न सघाउँछ ।’
