संविधान संशोधन प्रस्ताव संसदमा पेश हुँदै
काठमाडौं । आजको संसद बैठकमा संविधान संशोधन प्रस्ताव पेश हुँदैछ । बैठकमा कानुनमन्त्री डा. शिवमाया तुम्बाहाङ्फेले ‘नेपालको संविधान दोस्रो संशोधन विधेयक २०७७’ पेश गर्ने कार्यसूची संसद सचिवालयले तयार पारेको छ । यसलाई सर्वसम्मत पारित गराउने पहल सरकार गर्दै आएको छ ।
सर्वसम्मतिका लागि प्रधानमन्त्री केपी शर्मा ओलीले मंगलबार सर्वदलीय बैठक आयोजना गरेका थिए । बैठकमा प्रधानमन्त्रीले अन्य राजनीतिक दललाई राष्ट्रियताको सवालमा राष्ट्रिय सहमतिका लागि आग्रह गरेका छन् ।
लिम्पियाधुरा, कालापानी र लिपुलेक लगायतका भूभाग समेटिएको नेपालको अध्यावधिक नक्सा अनुसूची ३ मा उल्लेख गरिएको निशान छापमा राख्नुपर्ने भएकाले संविधान संशोधन गर्न लागिएको हो । प्रतिनिधिसभाको बैठक आज दिउँसो दुई बजेका लागि बोलाइएको छ ।
