ऐतिहासिक तथ्यका आधारमा दीर्घकालीन समाधान नेपालको अहिलेको परिपक्व रणनीति हुनुपर्छः कांग्रेस
काठमाडौं । नेपाली कांग्रेसले उच्च स्तरीय कुटनैतिक पहलमार्फत नेपाली भूमि रक्षा गर्न सरकारलाई सुझाव दिएको छ । पार्टी प्रवक्ता विश्वप्रकाश शर्माले सोमबार विज्ञप्ति जारी गरी उच्चस्तरीय कुटनैतिक प्रक्रिया मार्फत आजको मुद्दा समाधानका लागि गम्भीर पहलकदमी गर्न सरकारलाई सुझाव दिएका हुन् ।
विज्ञप्तिमा भनिएको छ, ‘सन् १८१६ को सुगौली सन्धीले नेपालको पश्चिमी सिमाना महाकाली नदी किटान गरेको ऐतिहासिक तथ्यनै विद्यमान प्रकरण समाधानको मुल आधार हो । अतः महाकाली नदी पूर्वको भू–भाग कालापानीबाट भारतीय सैनिक फिर्ता हुनुपर्ने र लिपुलेक एवं लिम्पियाधुरासम्मको नेपाली भूमिमा नेपालको अविच्छिन्न अधिकार निर्वाध रहनु पर्ने धारणा आजको मितिमा पुनः दोहोर्याउन चाहन्छौं ।’
