प्रधानमन्त्रीद्वारा संसद बैठक कक्षको अवलोकन, अधिवेशन बोलाउने तयारी
काठमाडौं । प्रधानमन्त्री केपी शर्मा ओली, सभामुख अग्नीप्रसाद सापकोटा, राष्ट्रिय सभाका अध्यक्ष गणेशप्रसाद तिमल्सिनालगायतले बुधबार संघीय संसद बैठक कक्षको स्थलगत अवलोकन गरेका छन् ।
सो अबसरमा उनीहरुलाई नोभल कोरोना भाइरस (कोभिड–१९) कारण सिर्जीत विषम परिस्थितमा संसद बैठकमा बसाई व्यवस्थापनका लागि संसद सचिवालयले गरिरहेको तयारीबारे जानकारी गराईएको थियो । सचिवालयले छैठौं अधिवेशनका लागि संघीय संसदको दुबै सदनको संयुक्त बैठक सामाजिक दुरी कायम गरी गरीने सीट प्लान’ बारे जानकारी गराएको हो ।
संघीय संसदको दुबै सदनमा गरी कुल सदस्यको संख्या ३३४ हुन्छ । हाल चार जना सांसद निलम्बनमा छन् । संघीय संसद अन्तरगत प्रतिनिधि सभाको बैठक कक्षमा तल ५ सय ४० सीट र माथि ४ सय ५० सीट छ ।
यसअघि आज विहान प्रधानमन्त्री ओली र सभामुख सपाकोटाबीच प्रधानमन्त्री निवास बालुुवाटारमा छलफल भएको थियो । सो छलफल संघीय संसदको बजेट (बर्षे) अधिवेशन बोलाउने, विनियोजन विधेयकका सिद्धान्त र प्राथमिकता र नीति तथा कार्यक्रमको विषयमा केन्द्रित रहेको थियो ।
