कुमारी बैंकले देवःलाई प्राप्ति गरेपछि चुक्तापुँजी साढे १२ अर्ब पुग्ने
काठमाडौं । कुमारी बैंकले देव विकास बैंकलाई प्राप्ति (एक्वायर) गर्ने भएको छ । यस सम्बन्धमा दुई बैंकबीच बुधबार समझदारीपत्रमा हस्ताक्षर भएको छ ।
समझदारीपत्रमा कुमारी बैंकका सञ्चालक समितिका सदस्य कृष्णप्रसाद ज्ञवाली र देव विकास बैंकका सञ्चालक समितिका सदस्य भरतबहादुर हमालले हस्ताक्षर गरे । दुवै आआफ्नो बैंकका प्राप्ति तथा मर्जर समितिका संयोजक हुन् ।
समारोहमा दुवै बैंकका अध्यक्ष, सञ्चालक समितिका सदस्य, प्रमुख कार्यकारी अधिकृतलगायत बैंकका उच्च व्यवस्थापनका पदाधिकारी सहभागी थिए ।
प्राप्तिपछि कुमारीको चुक्तापुँजी १२ अर्ब ५० करोडभन्दा बढी, निक्षेप १ खर्ब २० अर्ब तथा ऋण लगानी १ खर्ब ५ अर्ब रुपैयाँभन्दा बढी हुने बताइएको छ । बैंकका शाखा संख्या २ सय हुनेछन् ।
