इस्लामाबाद। पाकिस्तानको ब्रोड पिक हिमालमा हिमपहिरोमा परी बेपत्ता भएका १० पर्वतारोहीको खोजीका क्रममा उद्धार टोलीले चार शव फेला पारेको छ । तीमध्ये तीन जनाको शव बाहिर निकालिएको अधिकारीले जनाएका छन् ।
खराब मौसमका कारण हेलिकप्टरमार्फत खोजी तथा उद्धार कार्य प्रभावित भएको छ । गिलगिट(बाल्टिस्तान क्षेत्रीय सरकारले फेला परेका तीन शव नेपाली पर्वतारोही पूर्णबहादुर गुरुङ, ओमानी पर्वतारोही नथिरा अहमद र अमेरिकी पर्वतारोही म्यालोरी गेइसको भएको पुष्टि गरेको छ ।
शवहरू अस्पताल पठाइएको छ । अधिकारीका अनुसार चौथो शव पनि फेला परेको छ, तर त्यसको पहिचान अझै खुलाइएको छैन । गिलगिट(बाल्टिस्तानका मुख्यमन्त्री अमजद हुसेनले खराब मौसमका कारण शुक्रबार पनि उद्धार कार्य प्रभावित भएको बताएको छन् । अल्पाइन क्लब अफ पाकिस्तानका उपाध्यक्ष करार हैदरीका अनुसार ब्रोड पिक आरोहणका क्रममा हिमपहिरो गएपछि पर्वतारोहीको आधार शिविरसँग सम्पर्क विच्छेद भएको थियो ।
“टोली बिहीबारदेखि सम्पर्कविहीन छ,” उनले भने। खोजी तथा उद्धार कार्यमा पाकिस्तानी सेनाका हेलिकप्टरसमेत परिचालन गरिएको उनले जानकारी दिए। अधिकारीका अनुसार बेपत्ता पर्वतारोहीको खोजी शुक्रबार साँझसम्म जारी राखिएको थियो भने शनिबार पुन:सञ्चालन गरिने छ । आठ हजार ४७ मिटर उचाइको ब्रोड पिक विश्वको १२औँ अग्लो हिमाल हो ।
पाकिस्तानको काराकोरम पर्वतशृङ्खलामा अवस्थित यस क्षेत्रमा विश्वका ८,००० मिटरभन्दा अग्ला १४ हिमालमध्ये पाँच वटा रहेका छन् । अल्पाइन क्लबका अनुसार अभियान टोलीमा पाँच नेपाली, एक पाकिस्तानी, एक चिनियाँ, एक ओमानी, एक अमेरिकी तथा अर्का एक विदेशी पर्वतारोही सहभागी थिए । बेपत्ता भएकामध्ये आफ्ना कुनै नागरिक छन् कि छैनन् भन्नेबारे पुष्टि गरिरहेको चीनले आवश्यक परे सहयोग उपलब्ध गराउने जनाएको छ ।
अभियानको नेतृत्व नेपालमा जन्मिएका बेलायती पूर्वसैनिक तथा चर्चित पर्वतारोही निर्मल पुर्जाले गरेको थिए। उनले सन् २०१९ मा विश्वका १४ वटा आठ हजार मिटरभन्दा अग्ला हिमाल १८९ दिनमा आरोहण गरी विश्व कीर्तिमान बनाएको थिए ।
ब्रोड पिक आरोहणका लागि अभियान पाकिस्तानस्थित ट्राभल कम्पनी मुभिङ माउन्टेन्सले आयोजना गरेको थियो । कम्पनीका अनुसार अमेरिकी पर्वतारोही म्यालोरी गेइसका लागि यो पाकिस्तानको आठ हजार मिटरभन्दा अग्लो हिमालमा पहिलो आरोहण प्रयास थियो । उत्तरी पाकिस्तानमा हिमपहिरो र तीव्र रूपमा परिवर्तन हुने मौसमका कारण पर्वतारोहण अभियानमा दुर्घटना हुने घटना बारम्बार हुने गरेका छन् ।
प्रतिक्रिया