आलमलाई सफाइ दिने उच्च अदालतको फैसलाविरुद्ध सर्वोच्च अदालतमा पुनरावेदन

काठमाडौं । पूर्वमन्त्री मोहम्मद अफताब आलमसहित ५ जनालाई सफाइ दिने उच्च अदालतको फैसलाविरुद्ध सर्वोच्च अदालतमा पुनरावेदन परेको छ ।

महान्यायाधिवक्ता कार्यालयले आलमसहित महाताब आलम, शेख सेराज भन्ने शेख सराद र बद्री सहनीलाई उच्च अदालत जनकपुरको वीरगन्ज अस्थायी इजलासले दिएको सफाइविरुद्ध सर्वोच्चमा पुनरावेदन गरेको हो ।

वीरगन्ज इजलासका न्यायाधीश खुसीप्रसाद थारू र अर्जुन महर्जनको इजलासले गरेको फैसला त्रुटिपूर्ण रहेको भन्दै फैसला बदरको माग सहित महान्यायाधिवक्ता कार्यालयले सर्वोच्चमा पुनरावेदन गरेको हो । थारू र महर्जनको वीरगन्ज इजलासले गत जेठ १४ गते आलमलाई सफाइ दिएको हो ।

उक्त मुद्दामा रौतहट जिल्ला अदालतले उनलाई जन्म कैदको सजाय सुनाएको थियो । सफाइ दिने न्यायाधीशविरुद्ध न्याय परिषद्मा उजुरी परेपछि सर्वोच्च अदालतले दुवै जनालाई काजमा सर्वोच्च अदालत तानेको छ । त्यस विषयमा न्याय परिषद्ले समेत छानबिन गरिरहेको छ ।