काठमाडौँ । नेकपा माओवादी केन्द्रले उपसभामुख इन्दिरा राना मगरलाई महाअभियोग लगाएर हटाउने सत्तापक्षको तयारीको प्रतिवाद गरेको छ ।
मंगलबारको प्रतिनिधिसभा बैठकमा माओवादीका प्रमुख सचेतक हितराज पाण्डेले उपसभामुखलाई हटाउने सत्तापक्षको तयारीको प्रतिवाद गरेका हुन् ।
उनले यसकारेका सत्तापक्षलाई यथार्थ स्पष्ट पार्न आग्रह गरे । उनले भने, ‘उपसभामुख रानालाई पदबाट हटाउने कुरा सत्य हो भने माओवादी यसको प्रतिवाद र विरोध गर्दछ ।’
यस्तै माओवादी सांसद हितबहादुर तामाङले पनि यस विषयमा खबरदारी गरे ।
त्यस्तै माओवादी केन्द्रका अर्का सांसद देवेन्द्र पौडेलले प्रश्न उठेकै आधारमा राजीनामा दिने हो भने अहिलेका मन्त्रीहरू पनि राजीनामा दिन तयार हो भन्दै प्रश्न गरे ।
उनले बलियो सरकारले उपसभामुखलाई हटाउने कुरा दुःखदायी रहेको बताए । उनले भने, ‘प्रश्न उठेर राजीनामा दिने हो भने दशौँ मन्त्रीका बारेमा प्रश्न उठेको छ । राजीनामा दिन तयार हुनुहुन्छ ? छानबिन होस् । लाउडा, वाइडबडी, बालुवाटार जग्गा काण्ड गिरिबन्धु टी–स्टेटमा प्रश्न उठेको छ । छानबिन गर्न तयार हो ?’
पौडेलले उपसभामुखका साथमा माओवादी रहेकाले ढुक्क हुन आग्रह गरे ।
प्रतिक्रिया