सुदूरपश्चिम सरकार हराएको भन्दै विपक्षी दलले गरे दिउँसै बत्ती बालेर खोजी

सुदूरपश्चिम । सुदूरपश्चिम प्रदेशमा प्रतिपक्षी दलहरूले दिउँसो बत्ती बालेर सरकारको खोजी गरेका छन् । सोमबार दिउँसो दुई बजेको लागि प्रदेशसभा बैठक आह्वान गरिएको थियो ।

तर, सरकारको तर्फबाट कुनै पनि मन्त्री उपस्थित नभएपछि बैठक नै नबसी स्थगित भएको छ । बाढी पहिरोबाट ठूलो क्षति भएको र त्यही विषयमा प्रदेश प्रमुखसँग आग्रह गरेर आह्वान गरिएको विशेष अधिवेशनमा पनि सरकार उपस्थित नभएको भन्दै प्रतिपक्षी दलहरू आक्रोशित भएका हुन् ।

कांग्रेस ,एमाले र नागरिक उन्मुक्ति पार्टीले संसद स्थगित भएलगत्तै प्रदेश सभा परिसरमै मोबाइलको बत्ती बालेर सरकारको खोजी गरेका हुन् ।

मुख्यमन्त्री दीर्घ सोडारीलाई नैतिकताको आधारमा राजीनामा दिन समेत उनीहरुले आग्रह गरेका थिए । कांग्रेसका प्रमुख सचेतक विक्रमसिंह धामीले सरकारले संसद छलेर हिँडेको भन्दै यस विषयमा आफूहरू गम्भीर रहेको बताएका थिए ।