रास्वपाका सांसद ढकालको प्रश्नः विश्वासको मत लिएको दुई दिनभित्र किन डिआइजी मनोज केसीलाई सरुवा गरियो ?

काठमाडौं । राष्ट्रिय स्वतन्त्र पार्टीका सांसद हरि ढकालले एउटा अब्बल राष्ट्र सेवक कर्मचारीलाई थाहै नदिएर सरुवा गर्न नहुने बताएका छन् ।

आइतबारको प्रतिनिधिसभाको बैठकमा सांसद ढकालले डिआइजी मनोज केसीलाई यो सरकारले कसरी सरुवा गरेको भन्दै प्रश्न गरेका हुन् । उनले उनले यो गठबन्धन कुन उद्देश्यले बनेको भन्ने कुरा स्पष्ट भएको बताए ।

उनले भने, ‘विश्वासको मत लिएको दुई दिनभित्र कसरी डिआइजी मनोज केसीलाई सरुवा गरियो ? दुई दिन भित्रमा किन र के कारण, के उद्देश्यका लागि सरुवा गरिएको हो ? यसको उत्तर गृहमन्त्रीले दिनुपर्ने हुन्छ ।’

उनले नयाँ गठबन्धन बन्दै गर्दा अनुसन्धानको घेराभित्र रहेर अनुसन्धान हुनुपर्नेलाई मन्त्री बनाएर पुरस्कृत गरिएको बताए । उनले मानव बेचबिखन र हातहतियार सम्बन्धि मुद्दा खेपेकाहरुलाई मन्त्री बनाएको आरोप लगाए ।

उनले कांग्रेस महामन्त्री विश्वप्रकाश शर्माले यसअघि गत असार १० गते प्रहरी निरीक्षक सरुवा गर्ने बेलामा राखेको भनाई स्मरण गर्दै सांसद ढकालले प्रतिप्रश्न गरेका छन् ।

उनले भने, ‘कांग्रेसका महामन्त्रीज्यूले गत असार १० गते पोस्ट गर्नुभएको थियो, गलत भाष्य सावित गर्नका लागि । डीआईजी मनोज केसीको सरुवाको बारेमा तपाईं बोल्न सक्नुहुन्छ? यो सदनमा ? सक्नुहुन्न।’

त्यतिबेला कांग्रेस महामन्त्री शर्माले जिल्ला सूर्यदर्शन सहकारी संस्थाको अनुसन्धानमा संलग्न प्रहरी कार्यालय, कास्कीको अपराध अनुसन्धान तथा नियन्त्रण शाखामा कार्यरत सूर्यबहादुर मगरलाई रास्वपाका सभापति रवि लामिछानेले गृहमन्त्री भएका बेला हटाइएको सरुवा गरेको भन्दै आपत्ति जनाएका थिए ।