उपसभामुख पत्र प्रकरणः ९ लाख रूपैयाँ सचिवालयले लिएको रहेछ, फिर्ता भएको बैङ्क स्टेटमेन्ट छः मुकुल ढकाल

काठमाडौं । राष्ट्रिय स्वतन्त्र पार्टीका नेता डा. मुकुल ढकालले उपसभामुख इन्दिरा राना प्रकरणबारे राज्यले छानबिन गर्नुपर्ने बताएका छन् ।

मंगलबार सामाजिक संजालमार्फत ढकालले यो प्रकरणलाई पार्टी नेतृत्वले सुरु देखिनै नजरअन्दाज गर्दै आएकाले राज्यले छानबिन गर्नुपर्ने बताएका हुन् । उनले यसबारेमामा आफूसँग केही प्रमाण रहेको भन्दै राज्यले सोधपुछ र छानबिनका लागि बोलाए आफूसँग भएका प्रमाण दिन तयार रहेको बताएका छन् ।

उनले भनेका छन्, ‘उपसभामुखलाई सोधखोजपछि पनि म पीडितको सम्पर्कमा आफैँ पुग्न चाहेँ तर सम्पर्कमा आएको पीडितले ती पालिका सभापतिलाई ‘तपाईंले कुरा कता कता पुर्याउनु भयो, मेरो पैसा फिर्ता आयो’ बताइन् । ९ लाख रूपैयाँ उपसभामुख सचिवालयले लिएको रहेछ र त्यसलाई फिर्ता गरेपछि पीडितले बयान दिन र थप सम्पर्कमा आउन इन्कार गरिन् । पीडितका अनुसार ९ लाख फिर्ता भएको बैङ्क स्टेटमेन्ट अझै पनि पीडितसँग सुरक्षित छ ।’