काठमाडौं । राष्ट्रिय स्वतन्त्र पार्टीका सभापति रवि लामिछानेले कांग्रेस र एमालेको गठबन्धन बन्दा पनि काम गर्न नसके मुलुक भयावह हुने भन्दै त्यसतर्फ ध्यान दिन प्रधानमन्त्रीको ध्यानाकर्षण गराएका छन् ।
आइतबारको प्रतिनिधिसभाको बैठकमा सभापति लामिछानेले ठूला दलको सहमतिमा गम्भीर सन्देह पैदा भएको बताएका हुन् ।
उनले कांग्रेस एमालेले ३४ वर्षमा देखेको भन्दै यदि दुई दलको गठबन्धनले पनि काम गर्न नसके मुलुकको अवस्थाकाबारेमा के हुन्छ भन्ने कुरा सोच्न आग्रह गरे ।
उनले भने, ‘कांग्रेस र एमाले मिल्दा पनि कथंकदाचित यो गठबन्धनले काम गरेन भने के हुन्छ भन्ने कुराको अन्दाज गर्नुभएको छ ? समाजमा के सन्देश जान्छ सोच्नुभएको छ ? ३४ वर्षमा देखिसकेको छौं, के गर्नुभयो भनेर ।’
उनले लोकतन्त्रमा त्याग र बलिदानको बदलामा देशको हुर्मत नलिन चेतावनी दिँदै दुई ठूला दल मिले पनि आफूहरू कमजोर नभएको बताए ।
उनले सरकारले सुरुवातमै देखाएका संकेतहरुले आफूहरूलाई झस्काएको बताए । उनले आफ्नो कार्यकालमा विभिन्न भ्रष्टाचारबारे अनुसन्धान सुरु गरेकोमा त्यसलाई स्टन्ट भनेकोमा आपत्ति जनाए ।
सभापति लामिछानेले मन्त्रिपरिषद गठनबाटै सरकारले सुशासनका लागि काम गर्छ भन्ने आशंका उत्पन्न भएको बताए ।
उनले भने, ‘जुन ढंगले सरकार बन्यो र विषय अघि बढ्यो । जुन संकेत सुरुमा देखियो त्यसले हामीलाई झस्काएको छ । सरकार सुरु हुने वित्तिकै हामीले अनुसन्धान गरिरहेको विषय, हाजिरी जमानीमा छुटेको व्यक्ति बालकोटमा गीत गाउँदै हुनुहुन्थ्यो । बाँसबारी छालाजुत्ताको विषयको अनुसन्धान चलिरहँदा गीतको आवाज आयो बालकोटबाट, त्यहाँ हामीलाई शंका भयो । मन्त्रिपरिषद् गठनमा पनि आफूहरुले जजसको विषय उठाएको थियो, त्यहीँ उनीहरुलाई पुरस्कार दिइयो । नक्कली भुटानी शरणार्थी प्रकरणमा पुनः अनुसन्धान सुरु भयो, मन्त्रिमण्डलमा को गयो देशलाई राम्रोसँग थाहा छ।’
कांग्रेस-एमाले गठबन्धन हुनु केही दिन अघि कांग्रेस सांसद विनोद चौधरी ओली निवास बालकोटमा गीत गाइरहेको दृष्य सार्वजनिक भएको थियो ।
उनले उपसभामुख इन्दिरा रानामगरको बचाउ गरे । उनले उपसभामुख रानामगरले भिसाका लागि समय मिलाइदिनका लागि मात्र अमेरिकी दूतावासलाई पत्र लेखेको जिकिर गरे ।
प्रतिक्रिया