अर्थ मन्त्रालय पाएपछि मधेस सरकारमा सहभागी हुने कांग्रेसको निर्णय

जनकपुरधाम । नेपाली कांग्रेस मधेस प्रदेश सरकारमा सहभागी हुने भएको छ । बिहीबार बसेको कांग्रेसको प्रदेशसभा संसदीय दलको बैठकले पार्टी सरकारमा सहभागी हुने निर्णय गरेको हो ।

कांग्रेसले मुख्यमन्त्री सतीश सिंहसमक्ष आफ्नो पार्टीबाट मन्त्री हुनेको नामसमेत सिफारिस गरेको छ । कांग्रेसबाट प्रदेशसभा सदस्य सुनिल यादवलाई अर्थमन्त्री, जनार्दन क्षेत्रीलाई भूमि व्यवस्था, कृषि तथा सहकारी, शेषनारायण यादवलाई ऊर्जा, सिँचाई तथा खानेपानीमन्त्री र कौशलकिशोर रायलाई श्रम तथा यातायात मन्त्रीमा सिफारिस गरिएको छ ।

कांग्रेस सरकारमा सहभागी हुने भएसँगै जनमत पार्टीका सिंहको सरकारमाथिको संकट टरेको छ । यसअघि अर्थ मन्त्रालय नपाएको भन्दै कांग्रेसले सरकारलाई दिएको समर्थन फिर्ता लिने चेतावनी दिँदै आएको थियो ।