‘समाजवादी मोर्चा’ को ढोक्सामा पर्ला त माछा ?

काठमाडौं । पूर्वप्रधानमन्त्री डा. बाबुराम भट्टराईले माओवादी अध्यक्ष प्रचण्डले सत्ताबाट बाहिरिएलगत्तै ‘समाजवादी मोर्चा’ को नाममा ढोक्सा थाप्न सुरु गरेको आरोप लगाएका छन् ।

बुधबार सामाजिक संजालमार्फत भट्टराईले सडकमा पछारिएपछि प्रचण्डले ‘समाजवादी मोर्चा’ को पातलो ढोक्सा थाप्न सुरु गरेको आरोप लगाएका हुन् ।

उनले भनेका छन्, ‘अहिले उहाँहरू सडकमा पछारिनु भएको छ! ‘समाजवादी मोर्चा’ को पातलो ढोक्सा÷ढडिया थापेर केही भुरा माछा पर्छन् कि भनेर यताउति हेरिरहनु भएको छ ! केही नभेटेपछि फेरि उही आफ्नै ढोक्सामा रहेका पुराना माछालाई अर्को दलको नामबाट प्रस्तुत गरेर मोर्चाको आकार ठूलो भएको देखाउन खोजिरहनु भएको छ।’

भट्टराईले सत्तामा हुँदा अर्को पार्टीको सांसदलाई आफ्नो पार्टीको सांसदमा प्रस्तुत गरेकोमा अदालतले झापड दिएको बताए ।

उनले भने, ‘पहिले सत्तामा छँदा उहाँहरूलाई सांसद संख्या पुर्याउनु थियो । अर्को पार्टीबाट निर्वाचन लडेको र जितेको (ऐनको प्रावधान अनुसार नै साझा चुनावचिन्ह लिएको) मान्छेलाई जबर्जस्ती आफ्नो पार्टीको सांसदको रूपमा प्रस्तुत गर्नुभयो । हामीले स्वीकार्यौं ! (भलै गण्डकी प्रदेशको केसमा सर्वोच्च अदालतले जुन दलको उम्मेदवार हो सोही दलको सांसद रहने अन्तरिम आदेश दिइसकेको छ!) दल त्याग गरिसकेको मान्छेलाई हामीले कानून बमोजिम सबै प्रक्रिया पुर्याएर पार्टीबाट विदा गर्यौं! निर्वाचन आयोगले त्यसलाई स्वीकारेर अभिलेखीकरण गरिसकेको छ । निवर्तमान प्रधानमन्त्री र पूर्व प्रधानमन्त्रीहरूले अदालतको आदेश र निर्वाचन आयोगको निर्णय मान्नुपर्दैन ? उहाँहरू संविधान र कानून भन्दा माथि हो ¬? राजनीतिमा नैतिकता र मूल्यमान्यता भन्ने केही जिनिस हुँदैन ? सत्ता नै सबै थोक हो ? यसरी आउँछ ‘समाजवाद’ ?’