काठमाडौं । पूर्वपरराष्ट्रमन्त्री नारायणकाजी श्रेष्ठले प्रधानमन्त्रीको पदभार ग्रहण गरेकोमा प्रधानमन्त्री केपी शर्मा ओलीलाई बधाई दिँदै सरकारका काममा सहयोग गर्न आफू तयार रहेको बताएका छन् ।
सामाजिक संजालमार्फत श्रेष्ठले गृह र परराष्ट्र मन्त्रालयमा केही महत्वपुर्ण सुधारका कार्यहरु थालिएका र गुणात्मक सुधारका लागि गम्भीर गृहकार्यको प्रक्रिया अघि बढाइएको भन्दै त्यसमा सहयोग गर्न आफू तत्पर रहेको बताएका छन् ।
उनले भनेका छन्, ‘सम्माननीय प्रधानमन्त्री श्री केपी शर्मा ओलीज्यूले प्रधानमन्त्रीको पदभार ग्रहण गर्नुभएकोमा हार्दिक बधाई ज्ञापन गर्दछु र कार्यकालको सफलताको कामना गर्दछु । उहाँको मन्त्रिपरिषदका अन्य सदस्यहरुलाई पनि बधाई तथा सफलताको शुभकामना । यसबीचमा मैले सरकारमा रहेर इमान्दारीताकासाथ पूर्ण समर्पित भएर देश र जनताको पक्षमा काम गर्न कोसिस गरें । यसक्रममा हासिल भएका केही महत्वपूर्ण परिणामहरु सबैको जानकारीमा रहेकै छन् । गृह र परराष्ट्र मन्त्रालयमा केही महत्वपूर्ण सुधारका कार्यहरु थालिएका छन् र गुणात्मक सुधारका लागि गम्भीर गृहकार्यको प्रक्रिया अघि बढाइएको छ । यी कार्यहरुलाई निरन्तरता दिँदै निष्कर्षमा पुर्याउन सकिएमा राष्ट्र र जनताको आजको आवश्यकता र अपेक्षा पूरा गर्ने सन्दर्भमा महत्वपूर्ण उपलब्धी हासिल हुने निश्चित छ । त्यसैले म वर्तमान सरकार र सम्बन्धित मन्त्रीज्यूहरुलाई यसतर्फ गम्भीर ध्यानाकर्षण गराउन चाहन्छु । यसक्रमा देश र जनताको पक्षमा मेरो कुनै सल्लाह वा सहयोगको आवश्यकता महसुस भएमा त्यसका लागि सधैं तयार रहेको कुरा जानकारी गराउन चाहन्छु ।’
उनले सरकार बाहिर रहँदा पनि सबै सकारात्मक पक्षहरुसँग हातेमालो गर्दै अघि बढ्ने प्रतिबद्धता जनाएका छन् । उनले भनेका छन्, ‘म यस अवसरमा मलाई सरकारमा रहेर काम गर्ने अवसर प्रदान गर्नु हुने हाम्रो पार्टीका श्रद्धेय अध्यक्ष क . प्रचण्ड र सिङ्गो पार्टीलाई हार्दिक धन्यवाद ज्ञापन गर्दछु । साथै सरकारमा रहेर देश र जनताको पक्षमा कृयाशील रहँदा मलाई सहयोग र प्रोत्साहन गर्नुहुने सबैमा आभार तथा कृतज्ञता प्रकट गर्दछु । सरकार बाहिर रहदा पनि म सबै सकारात्मक पक्षहरुसंग हातेमालो गर्दै देश र जनताको पक्षमा पूर्ण निष्ठाका साथ कार्यरत प्रतिबद्धता व्यक्त गर्दछु ।’
प्रतिक्रिया