कांग्रेसलाई नौ र एमालेलाई आठ मन्त्रालय

काठमाडौं । नेपाली कांग्रेस र नेकपा एमालेबीच मन्त्रालयको बाँडफाँट टुंगिएको छ । शीर्ष नेताहरुको समझदारी अनुसार कांग्रेसले ९ र एमालेले ८ वटा मन्त्रालय लिने छन् ।

एमालेले अर्थसहित ८ मन्त्रालय र कांग्रेसले गृहसहित ९ वटा मन्त्रालय लिने सहमति भएको छ । एमालेका भागमा अर्थ, रक्षा, भौतिक पूर्वाधार, संघीय मामिला तथा सामान्य प्रशासन, शिक्षा, विज्ञान तथा प्रविधि, भूमि व्यवस्था, सहकारी तथा गरिबी निवारण मन्त्रालय, सञ्चार तथा सूचना प्रविधि र उद्योग वाणिज्य तथा आपूर्ति मन्त्रालय परेको छ ।

यस्तै, कांग्रेसले गृह, रक्षा, परराष्ट्र, ऊर्जा, स्वास्थ्य, सहरी विकास, पर्यटन, कानुन र वन मन्त्रालय पाउने भएको छ । मन्त्रीको टुंगो भने सोमबार लाग्ने भएको छ।

कांग्रेस उपप्रधानमन्त्री दिएर प्रकाशमान सिंहको नेतृत्वमा सरकारमा जाने छ भने एमालेले उपप्रधानसहित उपाध्यक्ष विष्णु पौडेललाई अर्थमन्त्री बनाउने भएको छ । सरकारमा सहभागी हुने साना दलका लागि कुन मन्त्रालय दिने भन्ने बिषयमा भने टुंगो लागेको छैन ।