प्रादेशिक सन्तुलन र समावेशिता कायम गरी मन्त्री चयन गर्ने कांग्रेसको निर्णय

काठमाडौं । नेपाली कांग्रेसले समावेशिता र प्रादेशिक सन्तुलन कायम गरी मन्त्री चयन गर्ने भएको छ । शनिबार पार्टी कार्यालय सानेपामा बसेको केन्द्रीय कार्यसम्पादन समितिको बैठकले मन्त्री बन्न दुई आधार तय गर्ने निर्णय गरेको हो ।

कांग्रेका प्रवक्ता डा. प्रकाशरण महतले समावेशिता र प्रादेशिक सन्तुलन कायम हुने गरी मन्त्री चयन गर्ने निर्णय भएको जानकारी दिए । त्यस्तै बैठकले एमाले अध्यक्ष केपी शर्मा ओली नेतृत्वको सरकारमा सहभागी हुने निर्णय गरेको छ।

असार १७ गतेको भएको सहमतिअनुरूप कांग्रेस ओली नेतृत्वको सरकारमा सहभागी हुने प्रवक्ता महतको भनाइ छ । कांग्रेस र एमालेको समर्थनमा अध्यक्ष ओलीले शुक्रबार नै प्रधानमन्त्रीमा दाबी पेस गरेका छन्।

राष्ट्रपति रामचन्द्र पौडेलले संविधानको धारा ७६(२) बमोजिम सरकार गठनको आह्वान गरेपछि संसदका दुई ठूला दल कांग्रेस र एमालेले शुक्रबार राति राष्ट्रपति कार्यालय पुगेर ओली नेतृत्वको सरकार गठनका लागि दाबी पेस गरेका हुन् ।

राष्ट्रपतिले आइतबार ओलीलाई प्रधानमन्त्री नियुक्तिको तयारी गरेका छन् । प्रधानमन्त्री नियुक्तिसँगै भोलि नै शपथ लिएर सानो आकारको मन्त्रीमण्डल बनाउने ओलीले तयारी गरेका छन् ।