राप्रपा, दुई जसपा र जनमत पार्टीले पनि प्रचण्डलाई विश्वासको मत नदिने

काठमाडौँ । राष्ट्रिय प्रजातन्त्र पार्टीले प्रधानमन्त्री पुष्पकमल दाहाल प्रचण्डलाई विश्वासको मत नदिने भएको छ । बिहीबार बसेको पार्टी संसदीय दलको बैठकले प्रधानमन्त्रीलाई विश्वासको मत नदिने निर्णय गरेको सांसद ज्ञानबहादुर शाहीले जानकारी दिए ।

नेपाली कांग्रेस र नेकपा एमालेले प्रधानमन्त्रीलाई विश्वासको मत नदिन पार्टीका सांसदहरुलाई ह्वीप जारी गरिसकेका छन् । उपेन्द्र यादव नेतृत्वको जनता समाजवादी पार्टी र अशोक राई नेतृत्वको जनता समाजवादी पार्टीले पनि प्रधानमन्त्रीलाई विश्वासको मत नदिने निर्णय गरिसकेका छन् ।

त्यस्तै डा. सीके राउत नेतृत्वको जनमत पार्टीले पनि प्रधानमन्त्रीलाई विश्वासको मत नदिने निर्णय गरेको छ ।

यता नेकपा एकीकृत समाजवादीले भने प्रधानमन्त्रीलाई विश्वासको मत दिने निर्णय गरेको छ । प्रधानमन्त्री प्रचण्डले शुक्रबार पाँचौपटक विश्वासको मत लिँदैछन्।